له پېښو سره د مبارزې آمادګۍ ملي ادارې سرپرست د فاریاب ولایت د کرم قول ولسوالۍ په میرزقوم کلي کې د ویجاړ شوي پل څخه لیدنه وکړه
له خطر سره د مخ سیمو د څارنې او ارزونې د دوامدارو سفرونو په ترڅ کې، له پېښو سره د مبارزې آمادګۍ ملي ادارې سرپرست, محترم الحاج ملا نورالدین ترابي، د فاریاب ولایت د کرم قول ولسوالۍ د میرزقوم کلي د ویجاړ شوي پل څخه لیدنه وکړه.
یاد پل چې ۲۵ متره اوږدوالی او ۳ متره پلنوالی لري، د شاوخوا ۲ زره کورنیو لپاره یوه مهمه د تګ راتګ لاره بلل کېږي. د کلي اوسېدونکو د لیدنې پر مهال خپلې ستونزې له محترم ترابي صاحب سره شریکې کړې او له هغه څخه یې د دې پل د بیارغونې غوښتنه وکړه. هغوی وویل چې د پل ویجاړیدو د تګ راتګ، خدماتو ته د لاسرسي او د لومړنیو توکو د لېږد په برخه کې جدي ستونزې رامنځته کړي دي.
محترم ترابي صاحب د خلکو د نظرونو له اورېدو وروسته ژمنه وکړه چې د دې پل د بیارغونې موضوع به په جدي توګه وڅېړل شي او له اړوندو ادارو سره په همغږۍ به د تخنیکي او عملي پړاوونو د پیل لپاره لازم اقدامات ترسره شي.
له پېښو سره د مبارزې آمادګۍ ملي اداره, د خطرونو د کمولو، له خطر سره د مخ سیمو د خلکو اړتیاوو د پوره کولو، او د ټولنو د مقاومت د لوړولو لپاره اغېزناکه او همغږي کوونکي اقداماتو ترسره کولو ته ژمنتیا لري.
محترم ترابي صاحب په خپلو خبرو کې ټینګار وکړ چې له ملي او نړیوالو بنسټونو سره نږدې همکاري کولای شي د خطرونو په کمولو او د ټولنو د مقاومت په لوړولو کې مهم رول ولري. نوموړي همداراز ژمنه وکړه چې دا اداره به د زیانمنو سیمو د وضعیت د ښهوالي لپاره بېړني اقدامات تر سره کړي.
دا سفر له پېښو سره د مبارزې آمادګۍ ملي ادارې د دوامدارو څارنیزو او ارزونې پروګرامونو یوه برخه ده، چې موخه یې د پېښو د مدیریت ښهوالی، زیانمنو ته اغېزناکه ځواب وینه او د مرکز او ولایتونو ترمنځ د همغږۍ پیاوړتیا ده.
نېټه: ۲۱/ ۱۲/ ۱۴۴۶ هـ ق
له پېښو سره د مبارزې آمادګۍ ملي اداره
