له پېښو سره د مبارزې آمادګۍ ملي ادارې د مالي او اداري عمومي رییس په افغانستان کې د چین هېواد له شارژدافیر سره وکتل

نن ورځ دو شنبه، له پېښو سره د مبارزې آمادګۍ ملي ادارې د مالي او اداري عمومي رییس، محترم الحاج مولوي صاحب محمد علم عالمیار د افغانستان لپاره د چین هېواد له شارژدافیر ښاغلي باؤ شوهوي او ورسره راغليو پلاوو سره په خپل کاري دفتر کې وکتل.
ښاغلې عالمیار صاحب راغلي پلاوي ته ښه راغلاست وویل او د چین هېواد د همکاریو او مرستو څخه یې ځانګړې مننه وکړه او زیاته یې کړه، چي د چین هېواد د افغانستان یو ښه دوست او ګاونډی دی او تل یې زموږ د حکومت او ولس سره خپله خواخوږي او غمشریکي څرګنده کړي ده او موږ به هم په هره برخه کي تل دوستانه اړیکي ورسره ولرو.
همداراز عالمیار صاحب، په تېرو کلونو کې د چین هېواد لخوا په هرات، خوست او پکتیکا ولایتونو کې د زلزله ځپلو سره د مرستو د یادونې تر څنګ وویل چې، یاد هېواد باید په دې بیړني حالت کې له ورستیو زلزله ځپلو سره هر ډول مرستې وکړي.
ورپسې، د دې ادارې د دفتر رییس محترم مولوي صاحب فضل الباري جواد، له راغلي پلاوي څخه د غمشریکۍ له امله مننه وکړه او زیاته یې کړه، چې له چین هېواد څخه د وروستیو زلزله ځپلو لپاره په روغتیایي، خوراکي، غیر خوراکي، موقتي او دایمي سرپنا جوړولو برخه کې د چټکو مرستو د کولو غوښتونکي یو.
همداراز، د نړیوالو اړیکو ریاست آمر برهان الدین شینواري وویل، چې د افغانستان لپاره د چین سپارت لومړنی سپارت دی، چې له موږ سره یې د تېرې غمیزې په پار غمشریکي وکړه نو له همدې امله ورڅخه د زړه له تله منندوی یو.
د چین شارژدافیر ښاغلې باؤ شوهوي د افغانستان هېواد له خلکو سره په وروستۍ غمیزه کې ځان شریک وباله او ویې ویل، چې موږ په هره برخه کې د دې پېښې له قربانیانو سره د مرستو کولو ته چمتو یو او همدارنګه یې زیاته کړه، چې اوسنی حالت د تشریفاتي کړنو نه دی باید بیړنی اقدام وکړو او له یو بل سره په همغږۍ کار وکړو. 
ښاغلي باؤ شوهوي دا هم وویل، چې زموږ رییس جمهور د نړۍ د هېوادونو له رییس جمهورانو سره په وروستیو کې د دې هېواد په پلازمینه کې غونډه لرله، چې له هرڅه وړاندې یې د افغانستان له طبیعي پېښو څخه د زیانمنېدو په اړه خبرې وکړې او زیاته یې کړه، چې د چین هېواد له افغانستان سره ښو اړیکو ته لیوال دی.

نیټه: ۱۴۴٧/٣/٨ ه. ق  
له پېښو سره د مبارزې آمادګۍ ملي اداره