له پېښو سره د مبارزې آمادګۍ ملي ادارې او د ODSAD موسسې تر منځ د ۶۴،۱۹۶ ډالرو په ارزښت د ګډو همکاریو تفاهم نامه لاسلیک شوه
نن ورځ یکشنبې له غرمې وروسته، له پېښو سره د مبارزې آمادګۍ ملي ادارې سرپرست؛ محترم الحاج ملا نورالدین ترابي، د پرمختیایي خدمتونو او د زراعت پرمختیا (ODSAD) مؤسسې له رئیس؛ محترم الحاج بابه خان وفایي سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
په پیل کې ترابي صاحب د یادې مؤسسې راغلي پلاوي ته ښه راغلاست وویل او زیاته یې کړه، چې د افغانستان خلک له طبیعي پېښو څخه ډېر اغېزمن کېږي باید پر وخت او زیاتې مرستې ورته ورسول شي، همداراز نوموړي زیاته کړه، چې موږ د مؤسسو لپاره د هغوی د بشري مرستو د وېشلو په موخه د پام وړ سهولتونه رامنځته کړي دي.
ورپسې، د پرمختیایي خدمتونو او د زراعت پرمختیا مؤسسې رئیس؛ محترم وفایي د خپلې پروژې په هکله معلومات وړاندې کړل او ویې ویل، چې موږ به د یادې پروژې له مخې زیامنو شویو کورنیو ته د هغوی د اړتیاوو د پوره کولو لپاره د دې ادارې د ولایتي ریاست د مسؤلینو سره په همغږۍ او د هغوی په شتون کې نغدي مرستې ووېشو.
د یادونې وړ ده، چې په پای کې د دواړو لوریو تر منځ ټولټال د څلور شپېته زره او یو سل او شپږ نوي (۶۴٫۱۹۶) ډالرو په ارزښت د ګډو همکاریو تفاهم نامه لاسلیک شوه، چې له مخې به یې د تخار ولایت په اشکمش ولسوالۍ کې ۳۹ زیانمنو شویو کورنیو هرې یوې ته د هغوی د کورونو د ترمیم په موخه ۵۵۰ ډالر ووېشل شي او همدارنګه په همدې ولسوالۍ کې به ۱۵هغو کورنیو ته، چې بیړنیو سرپناوو ته اړتیا لري د ۲۰۰۰ ډالرو په ارزښت به هرې کورنۍ ته د ۳۰ متره مربع په اندازه د لېږد وړ سرپناوې جوړې کړل شي.
نېټه: ۱۴۴۷/۰۱/۱۰ هـ ق
له پېښو سره د مبارزې آمادګۍ ملي ادا
