له پېښو سره د مبارزې آمادګۍ ملي ادارې او د ورلډ ویژن او کواک موسسو ترمنځ د ګډو همکاریو دوی تفاهم نامې لاسلیک شوې 

نن سهار د یکشنبې په ورځ، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي د کواک موسسې د مرکزي او ختیځ زون له مسوول، محترم عبدالوارث کریمي او په کابل کې د ورلډویژن موسسې له مسوول، محترم عبدالوهاب آرش سره جلا جلا په خپل کاري دفتر کې وکتل او د ګډو همکاریو تفاهم نامې یې ورسره لاسلیک کړې. 
محترم ترابي صاحب په جلا جلا ناستو کې د یادو مؤسسو مسؤلین وهڅول، چې لا ډېرې او د خلکو د اړتیاوو په پام کې نیولو سره  مرستې وړاندې کړي. نوموړي زیاته کړه چې د افغانستان خلک په بېلابېلو برخو کې مرستو ته اړتیا لري او موږ د خپلو ولایتي ریاستونو له لارې په ولایتونو کې د مؤسسو د اغېزمنو فعالیتونو لپاره زمینه برابره کړې ده.
ورته مهال، د دې موسسو مسؤلینو له پېښو سره د مبارزې آمادګۍ ملي اداره یوه ښه همکاره اداره وبلله او د دې ادارې له کارکوونکو څخه یې د قدردانۍ ترڅنګ په شفافه او پر وخت د پروژو د پلي کولو ژمنه وکړه.
د یادونې وړ ده، چې د لومړۍ تفاهم‌نامې له مخې چې ټولټال د شپاړس میلیونه او اته سوه او درې پنځوس زره او پنځه پنځوس (۱۶,۸۵۳,۰۵۵) افغانیو په ارزښت د دې ادارې او د کواک موسسې ترمنځ لاسلیک شوې، یاده موسسه به ۱۳,۲۶۶ کورنیو هرې یوې ته په سمنگان، بلخ، سرپل، فاریاب، بغلان، کندز، تخار او بدخشان ولایتونو کې د حفظ‌الصحې یوه بسته ووېشي او هغوی ته به د یو ورځني روزنیز ورکشاپ له لارې د حفظ‌الصحې پوهاوی هم وړاندې کړي.
همدارنګه د دې ادارې او د ورلډ ویژن موسسې ترمنځ ټولټال د دوه سوه او څلور دېرش زره او پنځلس (۲۳۴,۰۱۵) ډالرو په ارزښت د لاسلیک شوې تفاهم‌نامې له مخې به یاده موسسه ۵۹۸ کورنیو هرې یوې ته د درې میاشتو لپاره هره میاشت ۸۰ ډالر نغدې پیسې ووېشي. همدارنګه له دې جملې څخه یو شمېر کورنیو ته به د کانالونو او د اوبو د شبکو د پاکولو لپاره وسایل لکه بیل، کلنګ، پړی، لاسي ګاډۍ، شګه او سمنټ هم ووېشل شي او د “کار په بدل کې د نغدو پیسو” پروګرام به پلي شي.

نېټه: ۱۴۴۷/۴/۱۲ هـ ق
له پېښو سره د مبارزې آمادګۍ ملي اداره