له پېښو سره د مبارزې آمادګۍ ملي ادارې او د لاس په لاس موسسې (HIHAO) ترمنځ د ٣٩٨,١٦٨ ډالرو په ارزښت د ګډو همکاریو تفاهم نامه لاسلیک شوه
نن سهار (پنجشنبه)، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د لاس په لاس موسسې (HIHAO) له اجرائیوي رئیس ډاکټر احمد کامران حکمتي سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
ترابي صاحب په دې لیدنه کې ټینګار وکړ چې زما د کار پالیسي د موسسو لپاره د مرستو رسولو او د هغوی د فعالیتونو زمینه برابرول ده، او هڅه کوم چې د دوی چارې پر خپل وخت ترسره کړم. هغه همداراز له مؤسسو وغوښتل چې د خپلې بودجې زیاته برخه د وقایوي پروژو لپاره ځانګړې کړي چې خپلې چارې باید په چټکۍ او روڼتیا سره ترسره کړي.
ورپسې، ډاکټر احمد کامران حکمتي، د لاس په لاس مؤسسې اجرائیوي رئیس، د تفاهمنامې جزئیات وړاندې کړل او ویې ویل چې په دې پروژه کې د کورنیو لپاره د نغدي مرستو برابرولو، د خوراکي توکو چمتو کولو، او همداراز د سبزیجاتو اصلاحشوي تخمونو او کرنیزو وسایلو د وېش پروګرامونه شامل دي، چې د هرات ولایت په پنځو ولسوالیو کې به بزګرانو ته ورکړل شي.
د یادونې وړ ده چې دا مؤسسه به د ۳۹۸,۱۶۸ ( ٣ لکه، ٩٨ زره او ١۶۸) ډالرو په ارزښت، په څلورو پړاوونو کې، ۱,۲۷۷ کورنیو هرې یوې ته ۱۶۸ ډالر په پښتونزرغون، غوریان، گلران، اوبه، او کشک ولسوالیو کې وویشي. سربېره پر دې، ۱,۷۰۰ بزګرانو ته به په همدې ولسوالیو کې د سبزیجاتو اصلاحشوي تخمونه او د ۵۰ ډالرو په ارزښت کرنیز وسایل هم وویشل شي.
نېټه:۱۴۴۶/۸/۲۱
له پېښو سره د مبارزې آمادګۍ ملي اداره
