له پېښو سره د مبارزې آمادګۍ ملي ادارې او د عدالت غوښتنې او پیاوړتیا مدني مؤسسې ترمنځ د پنځه سوه، یو اویا زره اووه سوه او اوولس (۵۷۱,۷۱۷) ډالرو په ارزښت د ګډو همکاريو تفاهم‌نامه لاسلیک شوه 

نن ورځ یکشنبه له غرمې مخکې، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د عدالت غوښتنې او پیاوړتیا مدني مؤسسې له لوی رئیس، محترم عبدالحلیم حلیم سره په خپل کاري دفتر کې وکتل او د ګډو همکاريو تفاهم‌نامه یې ورسره لاسلیک کړه.
محترم ترابي صاحب په دې ناسته کې وویل چې اقلیمي بدلونونو ته په کتو په هېواد کې د بارانونو ورښت د ناڅاپي سېلابونو رامنځته کېدو لامل کېدای شي، له همدې امله، موږ د سېلابي لارو د پاکولو کار په بېلابېلو ولایتونو کې پیل کړی او له تاسو غوښتنه کوو چې له ډونرانو سره په خبرو کې د مرستو ډول له بشري مرستو څخه بنسټیزو پروژو ته واړوئ، ځکه د وقایوي پروژو پلي کول د ډونرانو، مؤسسو او خلکو لپاره د خوراکي او غیرخوراکي مرستو وړاندې کولو په پرتله ډیر اغېزمن دی.
په همدې حال کې، د یادې موسسې لوی  رئیس، محترم عبدالحلیم حلیم، د دې ادارې له لوري په چټکۍ سره د موسسو د فعالیتونو ترسره کولو په پار ځانګړې مننه وکړه او ویې ویل چې د همدې دلیل له مخې موږ لېوالتیا لرو چې په راتلونکې کې دوه نورې پروژې هم له پېښو سره د مبارزې آمادګۍ ملي ادارې سره په ګډه ترسره کړو.
د یادونې وړ ده، چې د دواړو لوریو ترمنځ ټولټال د پنځه سوه، یو اویا زره، اووه سوه او اوولس (۵۷۱,۷۱۷) ډالرو په ارزښت د ګډو همکاریو تفاهم نامه لاسلیک شوه، چې له مخې به یې یاده مؤسسه، چې ډونر یې یونیسف دی، د کونړ ولایت د وروستۍ زلزلې له امله زیانمنو خلکو ته لاندې خدمتونه وړاندې کړي:

۱. له ټولو خدماتو سره د څښاک اوبو ۶۰ ذخیرې برابرول، هره ذخیره ۵ متر مکعب ظرفیت لري، او دغو ذخیرو ته د ۹۰۰ ټانکرونو له لارې د اوبو لېږدول.
۲.     د اوبو رسونې ۶ شبکو بیا رغونه، چې ۸۰۰۰ کسان به ګټه ترې اخلي. 
۳. د څښاک اوبو فزیکي او بیولوژیکي ټسټ کول. 
۴. د ۱۸۰ تشنابونو او حمامونو جوړول، چې له دې جملې څخه ۱۵۰ یې فلزي او ۳۰ نور به له ترپال څخه جوړ وي، په شنې پردې د ښځینه تشنابونو او حمامونو پوښل او د تشانوبونو او حمامونو ساتنه او مراقبت کول.
۵. د معیوبینو کسانو لپاره د تشناب ۴۰ چوکیو برابرول او لېږدول. 
۶. د لنډمهاله هستوګنې په پنډغالو کې د ۵ سیټ کونیکس تشنابونو او حمامونو لګول، د پنډغالي په اړونده سیمو کې د کثافاتو او فاضلابو مدیریت او پاکول.
۷. د ۲۰۰ تشنابونو لپاره د بریښنا سیستم برابرول.
۸. د تشنابونو او حمامونو لپاره د ګرمو اوبو سیستم برابرول.
۹. د ۱۱۵ بېړنیو دست‌شویونو نصبول.
۱۰. د یونیسف د ۵۰۰۰ حفظه الصحې کېټونو وېشل. 
 
نېټه: ۱۴۴۷/۵/۲۵ هــ ق
له پېښو سره د مبارزې آمادګۍ ملي اداره