د کندهار ولایت له پېښو سره د مبارزې آمادګۍ ریاست ۷۵۰ مستحقو کورنیو ته نغدي او خوراکي مرستې ووېشلې
له پېښو سره د مبارزې امادګي ادارې او د HOPA موسسې ترمنځ د لاسليک شوي هوکړه ليک له مخې، چې د پروژې تمویل کوونکی یې د خوړو نړیوال پروګرام (WFP) دی، د کندهار ولایت له پېښو سره د مبارزې آمادګۍ ریاست د کندهار ښار په ۷ او ۹ ناحيه کې ۷۵۰ مستحقو کورنیو ته خوراکي او نغدي مرستې ووېشلې.
په دې لړۍ کې، هرې مستحقې کورنۍ ته د ماشومانو لپاره ۱.۵ کیلو تغذیوي خواړه، د میندو لپاره ۳ کیلو ځانګړي تغذیوي خواړه او همدارنګه ۲,۹۰۰ افغانۍ نغدي پیسې ووېشل شوې، چې په ټولیز ډول (۲,۱۷۵,۰۰۰) دوه ميليونه او يو لک او پنځه اويا زره افغانۍ نغدي پیسې د ياد شمېر کورنیو لپاره ځانګړې شوې وې.
د مرستو ترلاسه کوونکو د کندهار ولایت له پېښو سره د مبارزې آمادګۍ ریاست، د خوړو نړیوال سازمان (WFP) او HOPA مؤسسو څخه د مرستو پر وخت او شفاف ډول د وېش په پار مننه او قدرداني وکړه.
نېټه:۱۴۴۷/۱۲/۲۹ هـ ق
له پېښو سره د مبارزې آمادګۍ اداره
