د کابل ولایت له پېښو سره د مبارزې آمادګۍ ریاست په سروبي ولسوالۍ کې د ۹ کاریزونو د پاکولو او بیارغونې چارې بشپړې کړې

له پېښو سره د مبارزې د آمادګۍ ادارې او د انټرساس مؤسسې ترمنځ د لاسلیک شوي هوکړه‌لیک له مخې، د کابل ولایت له پېښو سره د مبارزې آمادګۍ ریاست، د یادې مؤسسې په مالي ملاتړ، د سروبي ولسوالۍ د جګدلک، مسته چینه، کرم چینه، منځ‌لاره، انګورتاک، تنګي، میاخېل او فرمان کلیو اړوند د ۹ کاریزونو د پاکولو او بیارغونې کار، چې څه موده وړاندې یې پیل کړی و، بشپړ کړ.

یاد کاریزونه د کلونو راهیسې د خټو او رسوباتو له امله ډک شوي او د سېلابونو له کبله زیانمن شوي وو، چې له امله یې د سیمې اوسېدونکي د څښاک او پاکو اوبو، او همدارنګه د کرنیزو ځمکو د خړوبولو لپاره د اوبو له کمښت سره مخ وو.
د دغو کاریزونو د پاکولو او بیارغونې کار له پېښو سره د مبارزې آمادګۍ ریاست تر دوامداره څارنې لاندې بشپړ شو او په بېرته فعالېدو سره یې، سلګونو کورنیو ته د څښاک اوبه برابرې شوې او زرګونو جریبه کرنیزو ځمکو ته د خړوبولو زمینه برابره شوه. همدارنګه، په یادو سیمو کې د اوبو د کمښت ستونزه تر ډېره بریده هواره شوه.

په پای کې، ۱۵۴ تنو کارګرانو ته، چې ۱۶ تنه یې ماهر او ۱۳۸ تنه یې غیرماهر کارګران وو، د کار په بدل کې نغدې پیسې ووېشل شوې. د یادو کارګرانو لپاره ټولټال اته لکه پنځه پنځوس زره او څلور سوه (۸۵۵,۴۰۰) افغانۍ ځانګړې شوې وې.