د کابل ولایت د پغمان ولسوالۍ په جنده خېل کلي کې یو استنادي دېوال پرانستل شو
د کابل ولایت له پیښو سره د مبارزې آمادګۍ ریاست، د پغمان ولسوالۍ په جندهخېل کلي کې د ۲۳ متره په اوږدوالي یو استنادي دیوال پرانست او ګټې اخیستنې ته یې وسپاره.
یاده پروژه له پېښو سره د مبارزې آمادګۍ ملي ادارې د وقایوي پروګرامونو یوه برخه ده، چې د طبیعي پېښو د خطرونو کمولو او په ټول هېواد کې د ټولنې د خوندیتوب کچې د لوړولو په موخه عملي کېږي.
دا پروژه د سېلابونو د خطرونو د راکمولو، د هستوګنیزو کورونو او د کرنیزو ځمکو د ساتنې په موخه عملي شوې ده.
د استنادي دیوال د پرانستې مراسم له پېښو سره د مبارزې آمادګۍ ملي ادارې د پلاوي، د کلي د ملکانو او د سیمه ییزو اوسېدونکو په شتون کې ترسره شول. د مراسمو پر مهال، مسؤلینو د ځایي زیربناوو د پیاوړتیا او د طبیعي پېښو پر وړاندې د ټولنې د زغم وړتیا په لوړو کې د دې پروژې پر ارزښت ټینګار وکړ.
په پای کې د جندهخیل کلي اوسېدونکو د دې پروژې له پلي کولو څخه خوښي وښوده او د خلکو د مال او ځان د ساتنې په برخه کې یې له پېښو سره د مبارزې آمادګۍ ملي ادارې له هڅو مننه وکړه.
نېټه: ۰۲/ ۱۱/ ۱۴۴۶
له پېښو سره د مبارزې آمادګۍ ملي اداره
