د پکتیکا ولایت له پېښو سره د مبارزې آمادګۍ ریاست په جانيخېل ولسوالۍ کې د AYSO مؤسسې د پروژې پلي کېدو له بهیر څخه څارنه وکړه
د پکتیکا ولایت له پېښو سره د مبارزې آمادګۍ ریاست تخنیکي ټیم د یاد ولایت په جانيخېل ولسوالۍ کې د AYSO مؤسسې د روانې پروژې د پلي کېدو له بهیر څخه څارنه او ارزونه وکړه.
دا څارنه له پېښو سره د مبارزې آمادګۍ ادارې او AYSO مؤسسې ترمنځ د لاسلیک شوي هوکړهلیک له مخې د جاني خېل ولسوالۍ په شنه زای کلي کې ترسره شوه. د دغې لیدنې پر مهال، د پروژې له دریو اساسي برخو، چې د ۲۵۵ متره په اوږدوالي د استنادي دېوال جوړول، د ۳۶ متره په اوږدوالي د پلچک جوړول او د کاریزونو پاکول په کې شامل وو، څارنه ترسره شو.
د ارزونې پر مهال، د پروژې په بېلابېلو برخو کې ترسره شوي فعالیتونه مثبت وارزول شول. د پکتیکا ولایت له پېښو سره د مبارزې آمادګۍ رئیس، قاري عبدالهادي، د پلي کوونکي ټیم د هڅو د ستاینې ترڅنګ، د موجودو ستونزو د حل په موخه د پروژې مسؤلینو ته لازمې سپارښتنې او لارښوونې هم وړاندې کړې.
