د پنجشیر ولایت په رُخه ولسوالۍ کې د طبیعي پېښو له خطر سره مخ ۹ سیمې سروې او تثبیت شوې
د پنجشیر ولایت له پېښو سره د مبارزې آمادګۍ ریاست د زیانمنونکو سیمو د پېژندنې او ارزونې د بهیر په دوام، د رُخه ولسوالۍ د ګلزنګر او حصارک کلیو د هغو ۹ سیمو سروې او تخنیکي ارزونه کړې چې د سیلابونو او د ډبرو د راښویېدو له خطر سره مخ دي.
یاده سروې د اړوندو ادارو د استازو او د پېښو د چارو د متخصصینو له تخنیکي ټیم سره په ګډه ترسره شوې ده. د سروې پایلې ښيي چې یادې سیمې د طبیعي پېښو له جدي خطر سره مخ دي.
د پنجشیر ولایت له پېښو سره د مبارزې آمادګۍ ریاست مسئولینو ویلي، د دغو ارزونو پایلې به د خطرونو د کمولو او د احتمالي زیانونو د مخنیوي لپاره د وقایوي اقداماتو د پلان جوړونې او پلي کولو بنسټ وګرځي.
همدارنګه، ټاکل شوې ده چې د رُخه ولسوالۍ په نورو سیمو کې هم د زیانمنونکو سیمو د سروې او تثبیت بهیر د راتلونکې اوونۍ په ترڅ کې دوام ومومي.
نېټه:۱۴۴۸/۱/۱ هـ ق
له پېښو سره د مبارزې آمادګۍ اداره
