د میدان وردګ ولایت له پېښو سره د مبارزې آمادګۍ ریاست په نرخ ولسوالۍ کې د سېلاب له امله د ویجاړو او تړل شويو عامه تاسیساتو د پاکولو او بیا رغونې چارې ترسره کړې

له پېښو سره د مبارزې آمادګۍ ملي ادارې د سرپرست، محترم الحاج ملا نورالدین ترابي، د لارښوونې پر بنسټ، د میدان وردګ ولایت له پېښو سره د مبارزې آمادګۍ ریاست، د یاد ولایت د نرخ ولسوالۍ د چین‌زايي کلي هغه سړکونه، سربندونه، ویالې او کاریزونه چې د وروستیو سېلابونو له امله زیانمن شوي وو، پاک او ترمیم کړي دي.
دا کارونه د ۱۳۵ تنو کاریګرو لخوا په ۱۴ ورځو کې ترسره شوي او هغه لارې او تاسیسات چې تړل شوي او زیانمن شوي وو، بېرته ورغول شول او اوس مهال د ګټې اخیستنې لپاره چمتو دي.
د یادونې وړ ده چې په دې وروستیو کې سخت سېلابونه د نرخ ولسوالۍ ځینې برخې تر خپل اغېز لاندې راوستې وې چې له امله یې یو شمېر کورونه ویجاړ شوي او ډېری کرنیز بنسټونه، سړکونه، سربندونه، کاریزونه او د اوبو کانالونه زیانمن شوي وو.  
د میدان وردګ ولایت له پېښو سره د مبارزې آمادګۍ ریاست، د زیانمنو کورنیو لپاره د خوراکي او غیرخوراکي مرستو د وېش سربېره، د زیانمنو عامه تاسیساتو د بیا رغونې پراخ اقدامات ترسره کړي چې دا اقدامات د سیمه‌ییزو خلکو له لوري ستایل شوي دي.

نېټه: ۱۴۴۷/۰۱/۲۶ هـ ق
له پېښو سره د مبارزې آمادګۍ ملي اداره