د لغمان ولایت له پېښو سره د مبارزې آمادګۍ ریاست په علیشنګ ولسوالۍ د کانال بیارغونې او محافظوي دیوال جوړېدو له پروژو څخه څارنه وکړه
د لغمان ولایت له پېښو سره د مبارزې آمادګۍ ریاست یو تخنیکي ټیم، د علیشنګ ولسوالۍ په میاصاحب دېرې او آخندزاده ګانو کلیو کې د کانال د بیارغونې، د نیالګیو کېنولو او د محافظوي دیوال جوړېدو له پروژو څخه چې له پېښو سره د مبارزې آمادګۍ ادارې او د DACAAR موسسې ترمنځ د لاسلیک شوي هوکړه لیک پر بنسټ یې کارونه ترسره کېږي، لیدنه او څارنه وکړه.
په دې پروژو کې د علیشنګ ولسوالۍ د میاصاحب دېرې په سیمه کې د هغه کانال د بیارغونې چارې، چې د تېرو سیلابونو او سختو ورښتونو له امله یې شاوخوا ۱۸ متره سنګکاري ویجاړه شوې وه، پیل شوې دي او تر دې دمه یې ۵۵ سلنه کار بشپړ شوی دی او ټاکل شوې چې پاتې کار یې د راتلونکې اوونۍ تر پایه بشپړ شي.
همدارنګه، د آخندزاده ګانو کلي په هغو سیمو کې چې د سیلابونو احتمالي خطر موجود و، د چاپېریال ساتنې، د طبیعي سرچینو د پیاوړتیا او د قدرتي پېښو د خطرونو د کمولو په موخه ۱۵۰۰ بېلابېل نیالګي کرل شوي دي، چې په کې ۷۰۰ د سپیدارو، ۷۰۰ د بید (ولې) او ۱۰۰ د توت نیالګي شامل دي.
سربېره پر دې، په هغو سیمو کې چې د خاورې د رسوب او خرابېدو خطر موجود و، یو محافظوي ګبین دیوال هم جوړ شوی، څو د سیلابونو او نورو قدرتي پېښو احتمالي زیانونه راکم او د سیمې د اوسېدونکو کورونه او کرنیزې ځمکې خوندي شي.
د سیمې اوسېدونکو د لغمان ولایت له پېښو سره د مبارزې آمادګۍ ریاست او DACAAR مؤسسې له لوري د ترسره شویو فعالیتونو او همکاریو ستاینه وکړه او څرګنده یې کړه چې د خطرونو د کمولو او د پېښو پر وړاندې د چمتووالي په برخه کې ترسره شوي اقدامات به د سیمې د خلکو لپاره اغېزمن او ګټور تمام شي.
د لغمان ولایت له پېښو سره د مبارزې آمادګۍ ریاست ټینګار کړی چې د قدرتي پېښو د خطرونو کمولو او د له خطر سره مخ سیمو د خوندیتوب په موخه به د ورته وقایوي او پراختیايي پروژو د پلي کېدو لړۍ دوام ومومي.
