د جوزجان ولایت له پېښو سره د مبارزې آمادګۍ ریاست ۸,۴۸۳ مستحقو کورنیو ته نغدي او خوراکي مرستې ووېشلې

له پېښو سره د مبارزې آمادګۍ ادارې او د کلیوالو سیمو د پراختیا او هوساینې لپاره د اقدام مؤسسې (AWDERO) ترمنځ د لاسلیک شوي هوکړه‌لیک له مخې، د جوزجان ولایت له پېښو سره د مبارزې آمادګۍ ریاست د یادې موسسې په همکارۍ، له سروې وروسته، د دې ولایت په خانقاه، منګجیک، مردیان، خماب او درزاب ولسوالیو کې د زیانمنو کورنیو د ملاتړ په موخه ۸,۴۸۳ مستحقو کورنیو ته نغدي او خوراکي مرستې ووېشلې.

په دې لړ کې، د مسوولینو په شتون کې، په خانقاه، منګجیک، مردیان او خماب ولسوالیو کې ۶۰۷۲ مستحقو کورنیو هرې یوې ته ۲۹۰۰ افغانۍ ووېشل شوې، چې په ټولیز ډول د دغو کورنیو لپاره اوولس میلیونه او شپږ لکه او اته زره او اته سوه (۱۷,۶۰۸,۸۰۰) افغانۍ نغدي پیسې ځانګړې شوې وې.

همدارنګه د درزاب ولسوالۍ په کلیو کې ۲۴۱۱ مستحقو کورنیو ته د خوراکي توکو بستې ووېشل شوې، چې هرې کورنۍ ته ۵۰ کیلو اوړه، ۶.۲۵ کیلو دال، نیم کیلو مالګه او ۴.۵۵ کیلو غوړي ووېشل شول.

په پای کې، د مرستو ترلاسه کوونکو کورنیو له پېښو سره د مبارزې آمادګۍ ریاست او همکارې مؤسسې څخه د مننې ترڅنګ، د مستحقو کورنیو لپاره د مرستو د دوام غوښتنه وکړه.