د جوزجان ولایت له پېښو سره د مبارزې آمادګۍ ریاست د صوفيقُله د خوړ د کیندنې چارې پیل کړې
د جوزجان ولایت د مقام د لارښوونې او د ټاکل شوي تخنیکي پلاوي د سروې له ترسره کېدو وروسته، د صوفيقُله خوړ د کیندنې عملي چارې پیل شوې.
د تخنیکي سروې له مخې، د کیندنې لپاره د ټاکل شوې لارې اوږدوالی ۱۱۰۰ متره، پلنوالی ۳ متره او ژوروالی یې له ۱ تر ۲ مترو پورې ټاکل شوی دی. دغه پروژه د سېلابونو له امله د رامنځته کېدونکو خطرونو د کمولو، د اوبو د بهیر د ښه مدیریت او د کرنیزو ځمکو، استوګنیزو کورونو او عامه تاسیساتو د زیانونو د مخنیوي په موخه پلې کېږي.
همدارنګه، د دې پروژې په چوکاټ کې د یوې پایې کېسینګ نصبول هم په پام کې نیول شوی، څو د حقآبې تأمین او د څلورو کلیو د کرنیزو اوبو تېرېدنه یقیني شي. دا به د دې لامل شي چې اوبه له کومې ستونزې پرته د خوړ له لارې لاندې تېرې شي او د سیمې د اوسېدونکو د اوبو حقوق خوندي پاتې شي. سربېره پر دې، د کېسینګ د دواړو غاړو سنګ کاري هم د پروژې برخه ده، څو لا زیات ټینګښت رامنځته او د اوبو د جریان له امله د احتمالي تخریب مخه ونیول شي.
ویل کېږي چې د دې پروژې په پلي کېدو سره به ۲۴ کلي په مستقیم ډول ګټه ترې واخلي او شاوخوا ۲۰۰۰ کورنۍ به د هغې له ګټو برخمنې شي. د دې پروژې بشپړېدل به د سېلابونو د خطرونو په کمولو، د کرنیزو ځمکو په ساتنه، د سیمې د اوسېدونکو د خوندیتوب په تأمین او د اوبو لګولو د وضعیت په ښه والي کې مهم رول ولوبوي.
نېټه: ۱۴۴۷/۱۲/۲۹ هـ ق
له پېښو سره د مبارزې آمادګۍاداره
