د بغلان ولایت په دهصلاح ولسوالۍ کې د سیلابي لارې د پاکولو کار بشپړ شو
له پېښو سره د مبارزې آمادګۍ ادارې د مقام د لارښوونې پر بنسټ، د بغلان ولایت له پېښو سره د مبارزې آمادګۍ ریاست د دهصلاح ولسوالۍ د شهشان درې د سیلابي لارې د پاکولو کار په بریالیتوب سره بشپړ کړ.
د دې پروژې په بشپړېدو سره، شاوخوا له ۲۵۰۰ څخه تر ۳۰۰۰ هغه کورونه، چې د سیلابونو له جدي ګواښ سره مخ وو، د سیلابونو د احتمالي زیانونو له خطر څخه خوندي شول.
د سیمې اوسېدونکو د دغې پروژې له بشپړېدو خوښي څرګنده کړه او دا یې د سیلابونو د خطرونو په کمولو، د خلکو د ستونزو په هواري او عادي ژوند ته د بېرته ستنېدو لپاره یو اغېزمن ګام وباله.
د بغلان ولایت له پېښو سره د مبارزې آمادګۍ ریاست ټینګار وکړ چې د هېوادوالو د ځان او مال د خونديتوب په موخه به د وقایوي پروژو او د قدرتي پېښو د خطرونو د کمولو چارې په دوامداره توګه روانې وي.
