له پېښو سره د مبارزې آمادګۍ ملي ادارې لوی رئیس د ۱۴ کاري کمېټو څخه راپور واخیستی
نن ورځ سې شنبه، ماذدیګر له پېښو سره د مبارزې آمادګۍ ملي ادارې لوی رئیس الحاج ملا نورالدین ترابي د یوې مهمې غونډې پر مهال د ۱۴ کاري کمېټو د استازو او کارکونکو څخه د نن ورځي راپور واخیستی.
د بېلابېلو کمیټو استازو او کارکونکو یو په بل پسې راپورونه وړاندې کړل او په دغو راپورونو کې د هغو کارونو یادونه وسوه چې د تېرو ورځو په جریان کې ترسره کړي وه، د خلکو سره د مرستې، د ستونزو د حل او د بیړنیو پېښو په وړاندې د چټک غبرګون په برخه کې بېلابېلې لاسته راوړنې بیان سوې.
ورسته ترابي صاحب په خپلو خبرو کې د ټولو کمېټو له مسؤلینو له هڅو مننه وکړه او ویې ویل د خلکو خدمت زموږ لپاره عبادت دی او هر څوک باید دا دنده په اخلاص، صداقت او پر وخت ترسره کړي.
نوموړي پر دې ټینګار وکړ چې د هر مسؤل وجیبه ده چي د خلکو ستونزه خپله ستونزه وبولي او د حل لپاره یې تر اخېري حده هڅه وکړي همدا راز ترابي صاحب وویل موږ ټول د یوې واحدې موخې لپاره سره یو ځای سوي یو او هغه موخه د خلکو خدمت، زیانمنو کورنیو ته رسیدګي او د ستونزو مخنیوی دی.
نېټه: ۱۴۴۶/۳/۹ هــ ق
له پېښو سره د مبارزې آمادګۍ ملي اداره
