له پېښو سره د مبارزې آمادګۍ ملي ادارې سرپرست د سرپل ولایت د اداري چارو تر لیدلو وروسته د بلخ ولایت له پېښو سره د مبارزې آمادګۍ ریاست څخه لیدنه وکړه او د یاد ولایت د مرستیال والي سره یې وکتل

نن ورځ  پنج شنبه، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د هېواد یو شمېر ولایتونو ته د دې ادارې د ولایتي ریاستونو د اداري چارو د سمون په موخه د خپل سفر په ترڅ کې بلخ ولایت ته ورسیدی او د یاد ولایت له پېښو سره د مبارزې آمادګۍ ریاست څخه یی لیدنه او د هغوی د کاري بهیر څخه یې څارنه وکړه.
محترم ترابي صاحب د یاد ریاست له هر یو کارکوونکي سره په جلا جلا توګه وکتل، د هغوی ستونزې، وړاندیزونه او مشورې یې واورېدې او ټول کارکوونکي یې پر وخت او اغېزناکه خدمتونو وړاندې کولو ته وهڅول.
همداراز، ترابي صاحب په بلخ ولایت کې له پېښو سره د مبارزې آمادګۍ ملي ادارې له ګدام څخه هم لیدنه وکړه او اړوندو مسؤولینو ته یې د خوراکي او غیر خوراکي توکو د ساتنې، تنظیم او ترتیب، نظم رامنځته کولو او د اړتیا پر بنسټ اړمنو خلکو ته د اړینو توکو د وېش په اړه لازمې لارښوونې وکړې. همدارنګه, ترابي صاحب ولایتي ریاستونو ته د ټولو تقنیني سندونو د رسېدو، د سند په مفهوم د پوهولو، سند د اړونده رئیس تر نظر تېرولو، د سند عملي کولو او په دوسیوو کې د ټولو اسنادو له ساتنې څخه څارنه وکړه.
همداراز, ترابي صاحب د ټولو نشراتي موادو څخه په ښه توګه د ګټې اخیستنې د بهیر او په یاد ولایت کې د تر کار لاندې پروژو څخه هم په هر اړخیزه توګه څارنه وکړه. 
د یادونې وړ ده چې څه موده مخکې, د مرکز څخه ټولو ولایتونو ته د کاري بهیر د څارنې او ارزونې لپاره هیئتونه لېږل شوي وو چې دغو هیئتونو د ولایتونو څخه ځینې ځینې نیمګړتیاوې په ګوته کړې وې او د ادارې د سرپرست لخوا له مرکز څخه ټولو ولایتونو ته په متحدالمال ډول د یو مکتوب په ذریعه د هغو نیمګړتیاوو یادونه شوې وه او ولایتي ریاستونو ته د دغو نیمګړتیاوو د پوره کولو په پار لازمې لارښوونې شوې وې او اوس مهال له پېښو سره د مبارزې آمادګۍ ملي ادارې سرپرست د دغو نیمګړتیاوو د پوره کولو په منظور د یاد ولایت د خدمتونو وړاندې کولو له کاري بهیر څخه هر اړخیزه څېړنه وکړه.
له پېښو سره د مبارزې آمادګۍ ملي ادارې د سرپرست د دې سفر موخه د ولایتي کارکوونکو د نظرونو، ستونزو او وړاندیزونو ترلاسه کول، د دفترونو تنظیمول، یو منظم کاري چاپیریال رامنځته کول، د ولایت له مقام سره د بشپړې همغږۍ رامنځته کول، د اسنادو د آرشیف په ښه توګه تنظیمول، د معیاري ګدامونو جوړول ، د نیمګړتیاوو ډکول او د وقایوي پروژو پلي کول دی.
د دې ترڅنګ، محترم ترابي صاحب د خپل سفر په ترڅ کې د یاد ولایت د مرستیال والي محترم مولوي نورالهادي ابو ادریس سره هم وکتل.
په دې لیدنه کې دواړو لوریو د پېښو د مدیریت څرنګوالي، زیانمنو خلکو ته پر وخت رسیدنې او د خطرونو د کمولو لپاره د وقایوي پروژو پر پلي کولو بحث وکړ.  
په پای کې، له پېښو سره د مبارزې آمادګۍ ملي ادارې سرپرست، له پېښو سره د مبارزې آمادګۍ ریاست کارکوونکي له مراجعینو سره نیک چلند کولو، د کارونو پر وخت او بې له ځنډه ترسره کولو، د بیت‌المال په سمه توګه کارولو او اداري اصول رعایت کولو ته وهڅول او له هغوی څخه یې وغوښتل چې د خلکو خدمتګاران واوسي او د هېواد د پرمختګ لپاره له خپلې مسلکي پوهې څخه ګټه واخلي. همدارنګه نوموړي هغوی ته نقدي مرستې هم وویشلې.

نېټه: ۱۴۴۶/۱۲/۲۲ هـ ق
له پېښو سره د مبارزې آمادګۍ ملي اداره