له پېښو سره د مبارزې آمادګۍ ملي ادارې سرپرست د بریتانیا هېواد له چارسمبالي سره وکتل 

نن سهار پنجشنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د افغانستان لپاره د بریتانیا هېواد له چارسمبالي رابرټ چترتن ډيکسن او د یاد هېواد له قونسل آډم رادکلیف سره په خپل کاري دفتر کې وکتل او د ګډو لېوالتیاوو او د پېښو مدیریت په اړه یې خبرې وکړې.
په دې کتنه کې ترابي صاحب وویل چې زموږ اساسي دنده د خلکو بشري وضعیت ته رسېدنه ده او دا کار د نړۍ همکاریو ته اړتیا لري. نوموړي زیاته کړه چې نړیواله ټولنه باید افغانستان په دې برخه کې یواځې پرېنږدي، ځکه افغانستان د نړۍ د یوې برخې په توګه د امنیت په ټنګښت، له دې جغرافیا نه نړۍ ته د هېڅ ډول ګواښ نه پېښېدو او د کوکنارو د کښت له منځه وړلو په برخه کې د پام وړ پرمختګونه کړي، چې باید نادیده و نه ګڼل شي.
ترابي صاحب همدارنګه د چارسمبالي له خوا د ادارې د لومړیتوبونو په اړه د مطرح شوي پوښتنې په ځواب کې وویل چې موږ په دوو اساسي برخو کې همکاریو ته اړتیا لرو: لومړی، بنسټیز او وقایوي کارونه، او دویم، زیانمنو ته په بېړه سره رسېدنه، نوموړي زیاته کړه چې موږ د زیانمنو لپاره ۹ قلمه خوراکي توکو او ۵ قلمه غیر خوراکي توکو ته اړتیا لرو، چې د برابرولو لپاره یې زموږ هڅې دوام لري او له تاسو هم غواړو چې د خپلو کاري اصولو په چوکاټ کې له موږ سره مرسته وکړئ.
په ورته وخت کې، د بریتانیا هېواد چارسمبالي چترتن ډيکسن، له ترابي صاحب څخه د لیدنې لپاره مننه وکړه او ویې ویل چې نړیواله ټولنه د افغانستان سره د تعامل په لټه کې ده، ځکه دا هېواد د نړۍ یوه برخه ده. نوموړي زیاته کړه چې زه د دې ادارې د کارونو له ځلېدو څخه خبر یم او له مرستندویه ادارو سره ستاسو د همکاریو په پار مننه کوم او موږ غواړو چې افغانستان د بشري ډیپلوماسۍ په برخه کې د نړۍ د هېوادونو په سر کې وي.
چارسمبالي ووېل چې موږ مخکې هم د مرستندویه ادارو له لارې د پېښو له امله زیانمنو ته رسیدنه کړې او دا لړۍ به د پېښو په صورت کې دوام ومومي. نوموړي دا هم وویل چې د بریتانیا هېواد د کډوالۍ نړیوالې ادارې (IOM) سره د جبري اېستل شویو کډوالو لپاره ۷.۵ میلیونه ډالر مرسته کوي.
ښاغلي رابرټ چترتن وویل چې موږ د یوه باثباته، پرمختللي او آباد افغانستان لپاره هیله مند یو.
د یادونې وړ ده چې په دې ناسته کې، د ماین پاکۍ د انسجام او همغږۍ رئیس قاري نورالدین رستم خېل، د دې ادارې د ماین پاکۍ د فعالیتونو په اړه خبرې وکړې او ویې ویل هغه هېوادونه چې پخوا یې په افغانستان کې فعالیتونه درلودل، باید له خپلو ژمنو سره سم، له هغو سیمو چې پخوا یې ګټه ترې اخیستې، د ناچاودو توکو د پاکولو په برخه کې همکاري وکړي.

نېټه:۱۴۴۶/۱۰/۱۲ هــ ق
له پېښو سره د مبارزې آمادګۍ ملي اداره