له پېښو سره د مبارزې آمادګۍ ملي ادارې او HHAO مؤسسې ترمنځ د یو سل او اویا زره او شپږ سوه اتیا (۱۷۰,۶۸۰) ډالرو په ارزښت د ګډو همکاریو تفاهمنامه لاسلیک شوه
نن چهارشنبه ماسپښين، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د HHAO مؤسسې له مرستیال، محترم سیفالله خان سره، په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
د ناستې په پیل کې، محترم ترابي صاحب، د HHAO مؤسسې پلاوي ته ښه راغلاست ووایه، او د یادې مؤسسې له مرستو او همکاریو څخه یې قدردانۍ وکړه. نوموړي ټینګار وکړ چې که چیرې د یادې مؤسسې په فعالیتونو کې هر ډول ستونزه پېښه شي، له پېښو سره د مبارزې آمادګۍ ملي اداره چمتو ده چې د حل لپاره یې پوره همکاري وکړي. همداراز، نوموړي له مسئولینو وغوښتل چې له زیانمنو افغانانو سره خپلې مرستو ته دوام ورکړي.
په دوام کې، د HHAO مؤسسې مرستیال، محترم سیفالله خان، د نوې پروژې په اړه معلومات وړاندې کړل او ویې ویل چې د دې پروژې بودیجه د UN Women لهخوا تمویلېږي او د HHAO لهخوا به پلي شي. نوموړي د تفاهمنامې د لاسلیک په برخه کې د یادې ادارې له همکارۍ او چټک اقدام څخه مننه وکړه، او د یادې پروژې د پلي کولو لپاره د زمینې برابرولو په برخه کې یې د ادارې له رهبرۍ څخه قدرداني وکړه.
د یادونې وړ ده چې د دې تفاهمنامې له مخې، یوه پروژه به ټولټال د یو سل او اویا زره او شپږ سوه اتیا (۱۷۰,۶۸۰) ډالرو په ارزښت د فاریاب ولایت په څلورو ولسوالیو بلچراغ، ګرزیوان، المار او خواجه سبزپوش کې پلي شي. د دې پروژې له مخې به، ۱۰۰۰ کورنیو ته، چې د طبیعي پېښو له امله زیانمنې شوې دي، نغدې مرستې ورکول کېږي، هغو کورنیو ته چې ښځې یې سرپرستې وي، هرې کورنۍ ته د WFP لهخوا ۱۸۰ ډالر ورکول کېږي او هغو کورنیو ته چې نارینه یې سرپرست وي، هرې کورنۍ ته ۱۵۰ ډالر ورکول کېږي.
سربېره پر دې، د HHAO مؤسسې لهخوا به هم دغو ټولو کورنیو ته ۱۱۰۰ افغانۍ نغدې مرسته ورکول کېږي.
تر دې پروژې لاندې، د نغدو مرستو تر څنګ، د پوهاوي او روزنې فعالیتونه هم ترسره کېږي، چې لاندې برخې په کې شاملې دي:
د ۷۰ تنو لپاره به د بیړنیو حالاتو پر وړاندې د چمتووالي او د عملیاتي پلانونو د ترتیب په موخه څلور ورځنی ورکشاپ ترسره کېږي؛
د طبیعي پېښو د خطرونو د کمولو په اړه به مجلې چاپ او قرطاسیې او بروشورونه ووېشل شي؛
د ۳۰ تنو ذینفعانو لپاره به یو ځانګړی ورکشاپ ترسره شي؛
د عامه پوهاوي په موخه، د یو میاشتې لپاره د راډیویي او مطبوعاتي پیغامونو خپرول، ترڅو خلک د طبیعي پېښو پر وړاندې چمتووالی ولري.
نېټه: ۱۴۴۷/۱/۱۳ هـ ق
له پېښو سره د مبارزې آمادګۍ ملي اداره
