له پېښو سره د مبارزې آمادګۍ ملي ادارې او د رها موسسې ترمنځ د ګډو همکاریو تفاهم نامه لاسلیک شوه
نن ورځ سېشنبه له غرمې مخکې، له پېښو سره د مبارزې آمادګۍ ملي ادارې د مالي او اداري عمومي رئیس، محترم الحاج مولوي محمد علم عالمیار په خپل کاري دفتر کې د رها موسسې له اجرائیوي رئیس، محمد یوسف حمیدیان سره وکتل او د ګډو همکاریو تفاهمنامه یې ورسره لاسلیک کړه.
محترم عالمیار صاحب وویل، چې له موسسو سره د همکاري په برخه کې له پېښو سره د مبارزې آمادګۍ ملي ادارې پالیسي داسې ده، چې تل هڅه کوي له هغوی سره همکاري وکړي ترڅو د هغوی له لارې خلکو ته زیاتې مرستې ورسول شي. نوموړي روانه پروژه ګټوره وبلله او په خپل وخت د پروژې د پلي کولو غوښتنه یې وکړه.
همدارنګه د یادې موسسې رئیس، محمد یوسف حمیدیان، د پروژې په اړه معلومات وړاندې کړل او ویې ویل چې دا یوه څېړنیزه پروژه ده او د پېښو له امله د بېځایه شويو او له ګاونډیو هېوادونو بېرته راستانه شویو کورنیو د ادغام د څرنګوالي په اړه ده او د څېړنې سیمې یې هم د کابل او هرات ولایتونه ټاکل شوي دي.
د یادونې وړ ده، چې د دواړو لوریو ترمنځ ټولټال د دیارلس زره (۱۳,۰۰۰) ډالرو په ارزښت د ګډو همکاریو تفاهم نامه لاسلیک شوه. د دې تفاهمنامې له مخې ټاکل شوې چې یاده موسسه به د بېځایه شویو او راستنېدونکو کورنیو لپاره د پالیسیو د پیاوړتیا او د دوامدارو حللارو وړاندې کولو په موخه په افغانستان کې څېړنې ترسره کړي او د سروې او مستقیمو مرکو له لارې به په هرات ولایت کې د بېځایه شویو او راستانه شویو وضعیت او اړتیاوې وڅېړي.
د دې څېړنې پایلې به په یوه جامع څېړنیز راپور کې راټولې شي او په کابل کې به په یوه مشورتي ناسته کې له پېښو سره د مبارزې آمادګۍ ملي ادارې سره په همکارۍ له ملي بنسټونو، غیر دولتي موسسو او نړیوالو سازمانونو سره شریکې شي.
نېټه:۱۴۴۷/۶/۱۸ هـ ق
له پېښو سره د مبارزې آمادګۍ ملي اداره
