د یونیسف او د کډوالۍ نړیوال سازمان استازو د نیمروز ولایت د پل ابریشم په سیمه کې د دې ادارې په پنډغالي کې د خدمتونو وړاندې کولو له بهیر څخه لیدنه وکړه
تیره ورځ شنبه، د یونیسف د دفتر استازې مېرمن ماریا بېګم او د کډوالۍ نړیوال سازمان (IOM) استازي محمد المصري د ایران او افغانستان ترمنځ پر پوله، د پل ابریشم په سیمه کې له ایران څخه د را اېستل شویو اجباري راستنېدونکو لپاره له پېښو سره د مبارزې آمادګۍ ملي ادارې په معیاري پنډغالي کې د خدمتونو وړاندې کولو له بهیر څخه د یادې ادارې د داخلي پلټنې آمر, قاري محمد یاسین او د نیمروز ولایت له پېښو سره د مبارزې آمادګۍ رئیس، مولوي محمد قاسم محمد په شتون کې لیدنه وکړه.
محترم قاري محمد یاسین د یادو سازمانونو مسؤلینو ته په پنډغالي کې د کډوالو لپاره د خدمتونو وړاندې کولو په اړه معلومات ورکړل او ویې ویل چې په ټولو خېمو کې د هوا یخولو لپاره کولرونه موجود دي، هغوی ته درې وخته ګرم خواړو ورکول کېږي او د انسانانو نورو لومړنیو اړتیاوو ته په کې ځانګړې پاملرنه شوې ده او کارکوونکي بې له ځنډه د کډوالو په خدمت کې بوخت دي.
په همدې حال کې، د دواړو ادارو مسؤلینو د یاد پنډغالي له جوړېدو هرکلی وکړ او د مرستندویو ادارو ترمنځ د همغږۍ پر زیاتوالي یې ټینګار وکړ. هغوی ژمنه وکړه چې، په نن او سبا کې به په پنډغالي کې د کلینیک او د ماشومانو د لوبو لپاره دوه کونکسونه را انتقال کړي، د کلینیک لپاره به څو تنه ډاکټران او نرس په معاش وګماري او د دې ترڅنګ د پنډغالي شاوخوا به یو منظم سیم خاردار هم واچول شي.
نېټه: ۱۴۴۷/۰۱/۱۷ هـ ق
له پېښو سره د مبارزې آمادګۍ ملي اداره
