د کندهار ولایت په څو ولسوالیو کې د ماینونو او چاودیدونکو توکو پاکول ترسره شول
د کندهار له پیښو د مبارزې آمادګۍ ریاست، د هیلو ټرسټ او DRC د بیړنیو ماین پاکولو ټیمونو سره په همغږۍ، د دې ولایت په څو ولسوالیو کې د ماینونو او چاودیدونکو توکو د پاکولو عملیات ترسره کړل.
په ارغنداب ولسوالۍ کې، د AIM-04 ټیم لخوا پنځه کیلوګرامه په لاس جوړ شوی ماین کشف او په خوندي ډول له منځه یوړل شو. په ارغستان کې، د هیلو ټرسټ QRT ټیم یو بشکه ماین شنډ کړ او د ماینونو د خطرونو په اړه خلکو ته د پوهاوي ورکولو لپاره تعلیمي پروګرامونه ترسره شول.
همدارنګه، په میوند، پنجوایي او دامان ولسوالیو کې، د DRC سازمان پنځمې QRT ټیم درې ناچاودې شیان او یو بشکه ماین کشف او په خوندي ډول له منځه یوړل.
د کندهار ولایت له پیښو سره د مبارزې آمادګۍ ریاست، ټول کشف شوي ماینونه او چاودیدونکي توکي په بشپړه توګه له منځه وړل شوي او د خلکو ژوند له احتمالي خطرونو څخه خوندي شوی دی.
نیټه: ۱۴۴۷/٢/٢٩ هـ ق
له پېښو سره د مبارزې آمادګۍ ملي اداره
