د کندهار ولایت په ارغنداب ولسوالۍ کې ناچاوده توکي کشف او خنثی شول
د کندهار ولایت له پېښو سره د مبارزې آمادګۍ ریاست په همغږۍ، د DRC ماین پاکۍ موسسې د پنځم چټک غبرګون ټیم د یاد ولایت د ارغنداب ولسوالۍ په کوهک کلي کې ناچاوده توکي کشف او په خوندي ډول خنثی کړل.
د ترسره شوو عملیاتو پر مهال د روسانو د وخت یو فیر ۱۲۲ ملي متره د توپ مرمۍ کشف او د مسلکي ټیم له خوا په خوندي ډول له منځه یووړل شوه.
د کندهار ولایت له پېښو سره د مبارزې آمادګۍ ریاست له ټولو هېوادوالو غوښتنه کوي، چې د هر ډول شکمنو او ناچاوده توکو د لیدو په صورت کې ژر تر ژره اړوندو ادارو ته خبر ورکړي او له لمس کولو یا نږدې کېدو څخه یې په کلکه ډډه وکړي، ترڅو د احتمالي مرګ ژوبلې مخه ونیول شي.
نېټه: ۱۴۴۷/۱۱/۲۷ هـ ق
له پېښو سره د مبارزې آمادګۍ اداره
