د کابل ولایت له پېښو سره د مبارزې آمادګۍ ریاست له ۲۰۳ زیانمنو او اړمنو کورنیو سره د خوراکي او غیرخوراکي توکو مرستې وکړې

د کابل ولایت له پېښو سره د مبارزې آمادګۍ ریاست, د تېرو مرستو په دوام په کلکان ولسوالۍ کې د طبیعي پېښو له امله ۲۰۳ زیانمنو او اړمنو کورنیو ته خوراکي او خوراکي مرستې ووېشلې.
د مرستو د وېش په دې پروګرام کې د کابل ولایت له پېښو سره د مبارزې آمادګۍ ریاست رییس محترم مولوي نجیب الله انوري ووېل, چې یاد ریاست پلان لري چې د کابل په ولسوالیو کې د زیانمنو خلکو د سروې او تثبیت بهیر ترسره کړي ترڅو له هغوۍ سره مرستې وکړي.
نوموړي زیاته کړه چې نن ورځ په مجموع کې ۲۰۳ کورنیو ته مرستې وېشل کېږي چې له دې جملې  څخه ۱۵۳ کورنۍ د طبیعي پېښو له امله زیانمنې شوي  وي او  همداراز ۵۰ نورې کورنۍ اړمنې پېژندل شوي.
د یادونې وړ ده چې په دۍ لړۍ کې هرې کورنۍ ته ۵۰ کیلو اوړه, ۲۵ کیلو وریجې, یو تخته روجایي, ۳ تختې کمپلې او ۱۴ قلمه توکي لرونکی یو روغتیایي کېټ ووېشل شول.
ورته مهال له مرستو برخه منو له یاد ریاست څخه د مرستو د وېش په پار مننه او خوښي څرګنده کړه او خلکو ته د مرستو رسولو له امله یې د هغوی د سلامتیا او د اسلامي نظام د بقا لپاره دعا وکړه.

نیټه: ۱۴۴۶/۶/۵
له پېښو سره د مبارزې آمادګۍ ملي اداره