د کابل ولایت له پېښو د مبارزې آمادګۍ ریاست ۱۵۷ مستحقو کورنیو ته نغدي او غیرخوراکي مرستې ووېشلې
له پېښو سره د مبارزې آمادګۍ ملي ادارې او د انټرساس نړیوالې مؤسسې ترمنځ د لاسلیک شوي هوکړه لیک له مخې، د کابل له پېښو سره د مبارزې آمادګۍ ریاست د یادې مؤسسې په ملاتړ، د دې ولایت د سروبي ولسوالۍ په جګدلک کلي کې ۱۵۷ مستحقو کورنیو ته نغدي او غیر خوراکي مرستې ووېشلې.
په دې لړۍ کې هرې کورنۍ ته د مسؤلینو په شتون کې، ۵،۸۰۰ افغانۍ او یوه ژمنۍ بسته ووېشل شوه، چې د نغدي پیسو برخه کې ټولټال د یاد شمېر کورنیو لپاره نه سوه او لس زره او شپږ سوه (۹۱۰،۶۰۰) افغانۍ ځانګړې شوې وې.
نېټه: ۱۴۴۷/۷/۸ ه.ق
له پېښو سره د مبارزې آمادګۍ ملي اداره
