د پنجشیر ولایت په عنابه ولسوالۍ کې د سیند د بستر د پاکولو او کیندنې چارې بشپړې شوې
د پنجشیر ولایت له پېښو سره د مبارزې آمادګۍ ریاست د رئیس محترم الحاج محبالله جاهد، د عنابه ولسوالۍ ولسوال محترم مولوي فضلالرحمن رحماني او د سیمې د سپینږیرو په شتون کې، د دې ولایت د عنابه ولسوالۍ د زمانکور کلي د سیند د بستر د پاکولو او کیندنې پروګرام په بریالیتوب سره پای ته ورسېد.
یاده پروژه د ۲۵ مترو په پلنوالی، ۱۵۰ مترو په اوږدوالی او ۲٫۵ مترو په ژوروالي، د یوې عرادې اسکواټر په وسیله عملي شوه، چې ټولټال ۱۲۱ کاري ساعته یې په ۱۸ ورځو کې ترسره کړل. د دې پروګرام د پلي کولو پر مهال، له پېښو سره د مبارزې آمادګۍ ریاست د چارو د پرمخ بیولو لپاره ۱۷۰۰ لیتره تېل برابر کړل او همدارنګه یې د مرسته کولو په موخه د سیمې ۱۵۰ تنو اوسېدونکو ته خوراکي توکي ووېشل. د دې پروژې ټولیز ارزښت ۴۴۰،۰۰۰ افغانۍ اټکل شوی دی.
د دې پروګرام موخه د اوبو د منظم بهیر لپاره د مناسبې لارې برابرول، د سیند د بستر د بندېدو مخنیوی او د سېلابونو د خطرونو کمول وو، چې د سیمې د خلکو په همکارۍ او د اړینو ماشینآلاتو په کارولو سره ترسره شو. په پایله کې، د سیند له بستر څخه د رسوباتو او اضافي موادو لویه برخه پاکه کړل شوه.
د دې پروژې په بشپړېدو سره، د اوبو منظمه تېرېدنه برابره او نیږدې ۵۰۰ جریبه کرنیزه ځمکه او همدارنګه په سیمه کې د موجود پل لپاره د سېلاب احتمالي خطرونه په څرګند ډول راکم شول. دا اقدام د کرنیزو ځمکو په ساتنه او د سیمې د اوسېدونکو د ژوند په ښه کېدو کې مهم رول لري.
نېټه: ۱۴۴۷/۰۷/۲۱ هــ ق
له پېښو سره د مبارزې آمادګۍ ملي اداره
