د ننګرهار ولایت له پېښو سره د مبارزې آمادګۍ ریاست ۷۲۴ زیانمنو کورنیو او ۳۵ تنه کاریګرو ته نغدي او غیر خوراکي مرستې ووېشلې

د ننګرهار ولایت له پېښو سره د مبارزې آمادګۍ ریاست د ماشوم ساتنې، RRAA او اکشن اېډ مؤسسو په مالي ملاتړ او د کډوالۍ نړیوال سازمان (IOM) په مالي او تخنیکي همکارۍ د ورستیو ورښتونو او سېلابونو له امله د یاد ولایت د جلال آباد ښار په امید آباد سیمه کې ۸۰، په اچین او سپین غر ولسوالیو کې ۳۸۷، شینوارو ولسوالۍ کې ۲۵۷ زیانمنو کورنیو ته او په مومندرې ولسوالۍ کې ۳۵ تنه کاریګرو ته د کار کولو په بدل کې له سروې وروسته نغدي او غیر خوراکي مرستې ووېشلې. 

په دې لړۍ کې د مسؤلینو په شتون کې، د کډوالۍ نړیوال سازمان (IOM) له لوري ۳۸۷ کورنیو هرې یوې ته یو د پخلنځي کېټ چې ۱۲ قلمه توکي پکې شتون درلود، یو عدد جارو، یوه تخته پلاستیکي فرش، ۳ تختې کمپلې، یو عدد څراغ او له یاد شمېر کورنیو څخه ۲۸ کورنیو ته چې سختې زیانمنې شوې وې هرې کورنۍ ته یو باب خېمه، د RRAA مؤسسې لخوا ۲۵۷ کورنیو هرې یوې ته ۱۰۹۰۰ افغانۍ نغدي پیسې، یو د روغتیا ساتنې کيټ چې ۴۴ قلمه توکو پکې شتون درلود، د اکشن اېډ مؤسسې له لوري ۸۰ کورنیو هرې کورنۍ ته ۱۰۹۲۰ افغانۍ نغدي پیسې او د ماشوم ساتنې مؤسسې له لوري ۳۵ تنه کاریګرو هره یوه ته ۵۹۲۵ افغانۍ نغدي پیسې ووېشل شوې، چې ټولټال د زیانمنو شویو کورنیو او کارګرو لپاره درې میلیونه او اته لکه او دوه اتیا زره او دوه سوه او اتیا (۳،۸۸۲،۲۸۰) افغانۍ نغدي پیسې ځانګړې شوې وې. 

د یادونې وړ ده، چې د مرستو ترلاسه کوونکو کورنیو د مرستو د ترلاسه کولو په پار له یادو بنسټونو او د دې ولایت له پېښو سره د مبارزې آمادګۍ ریاست له مسؤلینو څخه مننه وکړه او خوښي یې څرګنده کړه. 

نېټه: ۱۴۴۷/۱۱/۱۵ هـ ق

له پېښو سره د مبارزې آمادګۍ اداره