د افغانستان په یو شمېر ولایتونو کې د تېرې شپې د طبیعي پېښو سېلاب او زلزلې په اړه پېښو ته د رسېدو په چارو کې د دولت وزارت اعلامیه

پېښو ته د رسېدو په چارو کې د دولت وزارت په افغانستان کې د پېښو چارو ته د رسېدو او د مدیریت په برخه کې د مسوول بنسټ په توګه، د هېواد په یو شمېر ولایتونو کې د سېلاب او زلزلې پېښېدل تاییدوي.
د لومړنیو راپورونو له مخې، بدبختانه د زلزلې له امله د پکتیکا ولایت په ګیان، نکه، برمل او زروکه ولایتونو کې ۲۵۵ کسان شهیدان شوي او ۱۵۵ کسان نور ټپیان شوي، په خوست ولایت کې ۲۵ کسان شهیدان شوي او ګڼ شمېر نور ټپیان شوي دي. همدارنګه په ننګرهار ولایت کې هم ۵ کسان شهیدان شوي دي.
د هېواد په ۸ ولایتونو پکتیکا، کونړ، لغمان، بدخشان، بغلان، تخار، کندز او فاریاب ولایتونو کې د سېلاب له امله ۱۱ کسان شهیدان او ۵۰ کسان ټپیان شوي او څه د پاسه ۵۰۰ کورونه او ۳۵۰۰ جریبه کرنیزه ځمکه ویجاړه شوي ده. په ورته وخت کې ۲۰ کیلومټره سړک بند شوې او ۱۰۰۰ څاروي لمېنځه تللي دي.
پېښو ته د رسېدو په چارو کې د دولت وزارت د زیانمن شویو او شهیدانو کورنیو سره د خواښوګي ترڅنګ، اعلانوي چې زیانمن شویو ته د رسېدو لپاره خپلې ټولې هڅې یې کړي دي او ټول شته امکانات هغوۍ ته د رسېدو په پار په ولایتي ګودامونو کې لري او ډېر ژر به د اسلامي امارت پېښو سره د مبارزې عالي کمېسیون غړو بنسټونو او نورو ملي او نړیوالو همکارو موسسو سره په همغږي اړین اقدامات به ترسره کړي.