د نیمروز ولایت په زرنج ښار کې د ویالو او کانالونو د پاکولو پروژې دویم پړاو پیل شو
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي د لارښوونې پر بنسټ، د نیمروز ولایت له پېښو سره د مبارزې آمادګۍ ریاست د زرنج ښار د ویالو او کانالونو پاکولو د پروژې دویم پړاو پیل کړ. د یادې پروژې لومړی پړاو تر دې وړاندې په بریالیتوب سره بشپړ شوی و.
دغه پروګرام د ښاري حفظ الصحې د وضعیت د ښه والي، د چاپېریال د ککړتیا د مخنیوي، د اوبو د ډنډېدو او احتمالي سېلابونو د خطر د کمولو او د ښاریانو لپاره د پاک او سالم چاپېریال د رامنځته کولو په موخه، د زرنج ښاروالۍ ریاست په همکارۍ د پلي کېدو په حال کې دی. په دې پړاو کې، د ښار د ننه ویالو ترڅنګ، له لشکري نهر څخه زرنج ښار ته د اوبو لېږد کانالونه هم پاکېږي.
د نیمروز ولایت له پېښو سره د مبارزې آمادګۍ ریاست مسؤلینو وویل، د ویالو او کانالونو پاکول د ښاري وضعیت په ښه والي، د اوبو د جریان په اسانتیا، د سطحي اوبو د راټولېدو په مخنیوي، د بد بوی په کمولو، د ناروغیو په مخنیوي او د ښاریانو د روغتیا د کچې په لوړولو کې مهم رول لري.
همدارنګه، د دې پروګرام پلي کېدل د ښار په ښکلا، د ښاریانو د رضایت په زیاتوالي او د زرنج ښار لپاره د مناسبې ښاري څېرې په رامنځته کولو کې هم اغېزناک تمامېږي.
