د زابل ولایت له پېښو سره د مبارزې آمادګۍ ریاست ۴۲ سېلاب ځپلو کورنیو ته خوراکي او غیرخوراکي مرستې ووېشلې
د زابل ولایت له پېښو سره د مبارزې آمادګۍ ریاست، د ملګرو ملتونو د بشري مرستو د همغږۍ دفتر (OCHA) په همغږۍ او د IOM، WFP، UNFPA، AYSO، ADA او INTERSOS بنسټونو په مالي ملاتړ، د دغه ولایت په بېلابېلو ولسوالیو کې د سېلابونو له امله ۴۲ زیانمنو شوو کورنیو ته خوراکي او غیرخوراکي مرستې ووېشلې.
په دې لړۍ کې، د مسؤلینو په شتون کې، د خوړو نړیوال پروګرام (WFP) له لوري د ADA موسسې په همکارۍ، هرې کورنۍ ته ۲۰۰ کیلو اوړه، ۱۸.۸ لیتره غوړي، ۲۵ کیلو دال، ۲۲ کیلو بسکټ او ۲ کیلو مالګه د IOM سازمان له خوا هرې کورنۍ ته یوه کورنۍ بسته، ۲ د اوبو بېلرونه، ۳ تختې کمپلې او یو سولري څراغ د INTERSOS مؤسسې له لوري هرې کورنۍ ته د اوبو د تصفیې یوه بسته، یوه روغتیايي بسته او ۲ د روغتیا ساتنې بستې او همدارنګه د UNFPA او AYSO مؤسسو له خوا هرې کورنۍ ته ۲ تختې ترپالونه ووېشل شول.
همداراز، د IOM سازمان له خوا له همدې کورنیو څخه هغو ۳ کورنیو ته، چې کورونه یې په بشپړ ډول ویجاړ شوي وو، هرې کورنۍ ته یو باب خېمه هم ورکړل شوه.
نېټه: ۱۴۴۷/۱۱/۱۰ هـ ق
له پېښو سره د مبارزې آمادګۍ اداره
