د غزني ولایت له پېښو سره د مبارزې آمادګۍ ریاست د سېلابونو له امله ۴۳ زیانمنو کورنیو ته نغدي او غیر خوراکي مرستې ووېشلې
د غزني ولایت له پېښو سره د مبارزې آمادګۍ ریاست د کډوالۍ نړیوال سازمان (IOM )، پاور او DRC مؤسسو په ملاتړ، د یاد ولایت په مرکز، ګیلان، مقر، آب بند، قره باغ او ده یک ولسوالیو کې د وروستیو سختو بارانونو او سېلابونو له امله ۴۳ زیانمنو کورنیو ته له وروستۍ سروې وروسته نغدي او غیر خوراکي مرستې ووېشلې.
په دې لړۍ کې هرې کورنۍ ته د DRC مؤسسې له لوري ۱۰،۵۰۰ افغانۍ ورکړل شوې، د پارو مؤسسې لخوا هرې کورنۍ ته ۲۰۰ کیلو ګرامه اوړه، ۲۰ لېټره غوړي، ۲۵ کیلو ګرامه دال نخود او ۲ کیلو ګرامه مالګه او د IOM له لوري هرې کورنۍ ته یوه د پخلنځي وسایلو بسته، یوه کورنۍ بسته او یوه د سولري وسایلو بسته ووېشل شوه.
همدارنګه، د غزني ولایت له پېښو سره د مبارزې آمادګۍ ریاست محترم رئیس مولوي حمدالله بشیر، له زیانمنو کورنیو سره د خبرو کولو ترڅنګ یادو کورنیو ته ډاډ ورکړ، چې دا ریاست به په راتلونکي کې هم زیانمنو ته رسېدنې ته دوام ورکوي.
په پای کې، مرستو ترلاسه کوونکو کورنیو د ورکړلو شویو مرستو او دوی ته د پر وخت رسېدنې قدردانی وکړ او د ورته مرستو د دوام غوښتنه یې وکړه.
نېټه: ۱۴۴۷/۱۰/۲۸ هــ ق
له پېښو سره د مبارزې آمادګۍ ملي اداره
