د نیمروز ولایت په چخانسور ولسوالۍ کې له خټو څخه د اوبو کانال د پاکولو کار پیل شو
د نیمروز ولایت له پېښو سره د مبارزې آمادګۍ ریاست، له خټو او خاورو څخه د چخانسور ولسوالۍ د اوبو اصلي کانال، چې شاوخوا ۲۵ کیلومتره اوږدوالی لري د پاکولو کار یې د یو سل او اته نوي زره (۱۹۸,۰۰۰) افغانیو په لګښت پیل کړ.
د نیمروز ولایت له پېښو سره د مبارزې آمادګۍ رئیس، محترم الحاج مولوي محمد قاسم محمد وویل، چې دا پروژه د سېلابونو له امله د رامنځته کېدونکو خطرونو د مخنیوي په موخه پلې کېږي. د نوموړي په وینا، د دې پروژې اساسي موخه د اوبو د بهیر تنظیمول، د سېلابونو د خطرونو کمول او د خلکو د ژوند او کرنیزو ځمکو ساتنه ده.
په همدې حال کې، د چخانسور ولسوالۍ ولسوال مولوي نورالدین حمزه یاد کانال د ولسوالۍ د اوسېدونکو لپاره ډېر حیاتي وباله او ویې ویل چې د اوبو دا لاره له څو کلونو راهیسې نه وه پاکه شوې. د هغه په خبره، د دې پروژې پلي کېدل به د راتلونکو سېلابونو له خطرونو څخه د خلکو د ځان او مال په خوندي کولو کې مهم رول ولري.
د مسوولینو په وینا، د یاد کانال د پاکولو چارې به په معیاري او اساسي ډول ترسره شي، تر څو په راتلونکي کې هم د چخانسور ولسوالۍ د سېلابونو له ګواښ څخه خوندي پاتې شي.
نېټه: ۱۴۴۷/۷/۱۶ هـ ق
له پېښو سره د مبارزې آمادګۍ ملي اداره
