د فاریاب ولایت د بېلا بېلو سیمو په ۲۵ جوماتونو کې د خبرداري ورکولو سیستم نصب شو
له پېښو سره د مبارزې آمادګۍ ملي ادارې او د ماشومانو د ملاتړ موسسې ترمنځ د هوکړه لیک له مخې، د فاریاب ولایت له پېښو سره د مبارزې آمادګۍ ریاست د یادې موسسې په همکارۍ، د یاد ولایت د ګرزیوان ولسوالۍ په ۱۴ جوماتونو، د میمنې ښار په لومړۍ ناحیه او بي بي آینه ګذر کې ۸ جوماتونو او د پشتونکوټ ولسوالۍ د ګلدره کلي په ۳ جوماتونو کې د بېړنیو حالاتو پر مهال د خلکو د خبرتیا لپاره د وړاندیني خبرداري سیستم ووېشل او نصب کړل.
له پېښو سره د مبارزې آمادګۍ رئیس، محترم الحاج مولوي اسدالله وقاص وویل، چې د دې سیستم په نصبولو سره به سیمه ییزې کمېټې چې وړاندې یې روزنه ترلاسه کړې ده، د بېړنیو حالاتو پر مهال وکولای شي د طبیعي پېښو خطرونو کمولو او د خلکو د خبرتیا لپاره له دې سیستم څخه کار واخلي، چې په پایله کې به یې خلک د پېښو رامنځته کېدو پر مهال د احتمالي زیانونو د مخنیوي په پار مخکې له مخکې اړین تدابیر ونیسي.
نېټه:۱۴۴۷/۷/۱۰ هـ ق
له پېښو سره د مبارزې آمادګۍ ملي اداره
