په لوګر ولایت کې ۵۵ تنه روغو شویو روږدو کسانو ته حرفوي وسایل ووېشل شول
له پېښو سره د مبارزې آمادګۍ ملي ادارې او د AYSO مؤسسې ترمنځ د لاسلیک شوي هوکړه لیک له مخې، د لوګر ولایت له پېښو سره د مبارزې آمادګۍ ریاست د یادې مؤسسې په ملاتړ، په دې ولایت کې د یو ملاتړ کوونکي پروګرام په ترڅ کې ۵۵ تنه روغو شویو روږدو کسانو ته حرفوي وسایل ووېشل.
په دې پروګرام کې د امارتي ادارو او یادې مؤسسې یو شمېر مسؤلینو شتون درلود چې پکې ۲۵ تنه نارینه کسانو ته له مسلکي زده کړو وروسته د موټرسایکل جوړونې او لمریز سیستم وسایل او ۳۰ تنه ښځینه وو ته د حلالو عوایدو د پیدا کولو په موخه د خیاطۍ ماشینونه ووېشل شول.
د دې ولایت له پېښو سره د مبارزې آمادګۍ ریاست محترم رئیس د یادو توکو د وېشلو په لړۍ کې وویل، چې روږدو شویو روغو کسانو سره دا مرستې په ټولنه کې د ښه، آزاد ژوند او د ځان بساینې په موخه ووېشل شوې.
نېټه: ۱۴۴۷/۷/۸ ه.ق
له پېښو سره د مبارزې آمادګۍ ملي اداره
