په لغمان ولایت کې د راکټ يوه ناچاوده مرمۍ کشف او خنثی شوه
د لغمان ولایت له پېښو سره د مبارزې آمادګۍ ریاست د همغږۍ له مخې، د هیلو ټرسټ ماین پاکۍ نړیوالې موسسې تخنیکي ټیم د لغمان ولایت مرکز مهترلام اړوند د پنجپای په سیمه کې یوه ناچاوده مرمۍ کشف کړه او تر واک لاندې چاودنه کې یې په خوندي ډول له منځه یووړه.
یاده مرمۍ چې د BM1 راکټ یوه ناچاوده مرمۍ وه، چې د تېرو جګړو پاتې شوني وه او د کارولو وړ نه وه، خو د سیمې د اوسېدونکو لپاره یې جدي خطر رامنځته کړی و. د لغمان ولایت له پېښو سره د مبارزې آمادګۍ ریاست د ولایت په کچه د هيلو ټرسټ ماین پاکۍ موسسې په تخنیکي او مالي همکارۍ د ماینونو او ناچاوده توکو د موندلو او له منځه وړلو بهیر پیل کړی او له خلکو یې غوښتي چې د هر ډول ناچاوده توکو د لیدو په صورت کې له اړونده مسؤلینو سره اړیکه ونیسي ترڅو د احتمالي خطرونو مخنیوی وشي.
نېټه:۱۴۴۷/۶/۲۲ ه ق
له پېښو سره د مبارزې آمادګۍ ملي اداره
