د پنجشیر ولایت له پېښو سره د مبارزې آمادګۍ ریاست په ماله کلي کې د یو پل د دیوال د استحکام کار پیل کړ
د پنجشیر ولایت له پېښو سره د مبارزې آمادګۍ ریاست او د ولایت مقام د ماله کلي د اوسېدونکو په همکارۍ، د یاد کلي د پیاده رو پل د دیوال چې د تېرو اوبو لوړېدو له امله زیانمن شوی و، د استحکام کار پیل کړ.
یاد دیوال ۱۰ متره اوږدوالی، ۱ متر پلنوالی او ۲ متره لوړوالی لري چې له پېښو سره د مبارزې آمادګۍ ریاست د دی فعالیت د اسانتیا لپاره ۲۰ بکسه ګبیون برابر کړي دي، څو د تحکیم کارۍ چارې په اغېزمن ډول ترسره شي.
د دی اقدام ترڅنګ، له پېښو سره د مبارزې آمادګۍ ریاست د سیمې اوسېدونکو او هغو کسانو ته چې د کار په ترسره کولو کې مرسته کوي، د قدردانۍ په توګه د خوراکي توکو مرستې هم وېشي.
له پېښو سره د مبارزې ولایتي کمیسیون تخنیکي پلاوي د راپور له مخې، د یاد دیوال استحکام به د نورو احتمالي وېجاړیو د مخنیوي تر څنګ، د پیاده رو لارې د خوندي تګ راتګ په ټینګښت کې مهم رول ولوبوي.
نېټه:۱۴۴۷/۶/۱۸ هـ ق
له پېښو سره د مبارزې آمادګۍ ملي اداره
