د بلخ ولایت له پېښو سره د مبارزې آمادګۍ ریاست په زاري ولسوالۍ کې د ګبیوني استنادي دیوال د جوړولو کار بشپړ او ګټې اخیستنې ته وسپاره
له پېښو سره د مبارزې آمادګۍ ملي ادارې د لوی رئیس، محترم الحاج ملا نورالدین ترابي د لارښوونې پر بنسټ، د بلخ ولایت له پېښو سره د مبارزې آمادګۍ ریاست د زاري ولسوالۍ د درز په نښلوونکې لاره کې د ګبیوني استنادي دیوال د جوړولو کار بشپړ کړ او رسماً یې ګټې اخیستنې ته وسپاره.
دا دیوال د ۱۰۰ متره په اوږدوالي، ۲ متره پلنوالي او ۳ متره په لوړوالی ټولټال د نه سوه اووه نوي زره او پنځه سوه (۹۹۷،۵۰۰) افغانیو په لګښت جوړ شوی دی. د یادې پروژې موخه د هغې نښلوونکې لارې د غاړو استحکام دی چې ۱۶ کلي د ولسوالۍ له مرکز سره نښلوي. دا لاره په تېرو کلونو کې د موسمي ورښتونو او سېلابونو د راوتلو له امله هر کال تړل کېده چې خلکو ته یې ګڼې ستونزې جوړې کړې وې. د دی دیوال په جوړېدو سره د لارې د بندېدو ستونزه هواره شوې او د لارې په دواړو غاړو کې د خاورې د خرابېدو مخه هم نیول شوې ده.
نېټه:۱۴۴۷/۶/۱۵ هـ ق
له پېښو سره د مبارزې آمادګۍ ملي اداره
