له پېښو سره د مبارزې آمادګۍ ملي ادارې لوی رئیس د کونړ ولایت د څوکۍ ولسوالۍ د دیوه ګل درې په زوړ کلي کې د زوړ کلي له پنډغالي څخه لیدنه وکړه او د شهیدانو او ټپیانو کورنیو ته یې نغدې مرستې ووېشلې
نن سهار د یکشنبې په ورځ، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د کونړ ولایت د څوکۍ ولسوالۍ د دیوه ګل درې په زوړ کلي کې د زوړ کلي له پنډغالي څخه لیدنه وکړه او د شهیدانو او ټپیانو لپاره یې د دعا کولو ترڅنګ د هغوی کورنیو ته نغدې مرستې هم ووېشلې.
محترم ترابي صاحب وویل، چې د پېښې په لومړۍ ورځ موږ له ګڼ شمېر مرکزي کارکوونکو سره زلزلهځپلو سیمو ته راغلي وو او له ویجاړیو څخه د شهیدانو د ایستلو، چورلکو ته د ټپیانو د انتقال او وروسته بیا روغتونونو ته د رسولو په بهیر کې مو مرسته کړې وه، او اوس مهال، د عالیقدر امیرالمؤمنین حفظه الله د لارښوونې پر بنسټ، زیانمنو کورنیو ته د مرستو د وېش او رسېدنې د بهیر د څرنګوالي د څارنې په موخه دې ولایت ته راغلي یو، څو وګورو چې مرستې تر کومه اندازه مستحقو کسانو ته رسېدلې دي.
له پېښو سره د مبارزې آمادګۍ ملي ادارې لوی رئیس، د مرستو د وېش پر مهال د شهیدانو له کورنیو سره خواخوږي وکړه او ویې ویل، چې دا نغدې مرستې یوازې د تسلیت او یادونې په موخه دي. نوموړي د هر شهید کورنۍ ته شل زره (۲۰,۰۰۰) افغانۍ او هر ټپي ته لس زره (۱۰,۰۰۰) افغانۍ ووېشلې.
نېټه: ۱۴۴۷/۳/۲۱ هـ ق
د پېښو سره د مبارزې د آمادګۍ ملي اداره
