د کونړ ولایت له پېښو سره د مبارزې آمادګۍ ریاست د استنادي دیوال د جوړولو کار پیل کړ
د عالیقدر امیرالمومنین حفظ الله د لارښوونې پر بنسټ, د طبیعي پېښو د خطرونو د کمولو په موخه, هر ولایت ته د وقایوي پروژو د پلې کولو لپاره یو میلیون افغانۍ ځانکړې شوې دي, په همدې چوکاټ کې, له پېښو سره د مبارزې آمادګۍ ملي اداره د لومړنۍ سروې ترسره کولو وروسته د هېواد په کچه بېړنۍ وقایوي پروژې پلې کوي.
د کونړ ولایت له پېښو سره د مبارزې آمادګۍ ریاست, د یاد ولایت د منورې ولسوالۍ په ډبونو کلي کې د یو خوړ په اوږدو کې، د سېلابونو له خطرونو څخه د خلکو د ژوند، هستوګنځایونو او کرنیزو ځمکو د ساتنې په موخه د ۴۰,۰۰۰ (څلوېښت زره) افغانیو په ارزښت د ۸۰ متره په اوږدوالي د استنادي دیوال د جوړولو کار رسماً پیل کړ.
د ډبونو د کلي دا خوړ چې هر کال د موسمي سېلابونو پکښې د راوتلو له امله ګڼ مالي او ځاني زیانونه اړوي, د یاد استنادي دېوال په جوړېدو سره به نږدې ۳۰۰ کورونه، پراخې کرنیزې ځمکې، یوه دیني مدرسه او یو جومات د سېلابونو له احتمالي خطرونو څخه خوندي پاتې شي. د دې پروژې موخه د سېلابونو د خطرونو کمول، د خلکو د شتمنیو ساتنه او د خوړ دواړو غاړو ته د سیمو خوندیتوب دی. دغه دیوال به د انجنیري اصولو پر بنسټ جوړ شي، ترڅو د اوږد مهاله مقاومت وړتیا ولري.
د سیمې اوسېدونکو د دې اقدام هرکلی وکړ او ترڅنګ يې له پېښو سره د مبارزې آمادګۍ ملي ادارې, د ولایت مقام او د دې ولايت له پېښو سره د مبارزې امادګۍ رياست څخه د دوی د ستونزې د حل لپاره د عملي ګام اخیستو په پار مننه او قدرداني وکړه.
نیټه: ۱۴۴۷/۰۱/۲۷ هـ ق
له پېښو سره د مبارزې آمادګۍ ملي اداره
