د قزاقستان هېواد له افغانستان سره د ۳۶ واګونونو خوراکي او غیر خوراکي مرستې وکړې
نن ورځ پنجشنبه، د قزاقستان هېواد، ۳۶ بار وړونکي واګونه خوراکي او غیرخوراکي مرستې په افغانستان کې د پېښو له امله زیانمنو سره د مرستې او رسیدنې په موخه را ولېږلې.
د دغو مرستو د سپارلو مراسم, له پېښو سره د مبارزې آمادګۍ ملي ادارې د مالي او اداري عمومي رئیس, الحاج مولوي محمد علم عالمیار، د قزاقستان قونسل، د بلخ ولایت د مقام مرستیال، د دې ادارې د نړیوالو اړیکو رئیس، د بلخ ولایت له پېښو سره د مبارزې آمادګۍ رئیس، د بلخ ولایت د استراس سهمي شرکت رئیس، د بهرنیو چارو وزارت استازي او د دواړو هېوادونو یو شمېر دولتي لوړپوړو چارواکو او د رسنیو د استازو په شتون کې ترسره شول.
په دې مراسمو کې, الحاج مولوي محمد علم عالمیار، د مالي او اداري عمومي رئیس، د قزاقستان د بشر دوستانه مرستو څخه د مننې ترڅنګ، له نورو هېوادونو او نړیوالو موسسو څخه هم وغوښتل چې په افغانستان کې د طبیعي پېښو له امله زیانمنو سره مرستې وکړي.
همداراز، د قزاقستان قونسل، د خپل هېواد د تېرو مرستو او د افغانستان او قزاقستان ترمنځ د تجارتي اړیکو په اړه خبرې وکړې او د بشردوستانه مرستو د دوام ژمنه یې وکړه.
ورپسې, د بلخ ولایت د مقام مرستیال د قزاقستان له حکومت او ولس څخه د قدرداني ترڅنګ د مرستو د دوام غوښتنه وکړه، همداراز یې له ګاونډیو او نړیوالو هېوادونو څخه هم وغوښتل چې د افغانستان له اړمنو سره د مرستو په برخه کې همکاري وکړي.
د یادونې وړ ده, چې د قزاقستان دغه ۳۶ واګونه مرستې، چې له حیرتان بندر څخه افغانستان ته وارد شوي دي, ۱۰۰۰ ټنه اوړه، ۱۰۰۰ لیټره غوړي، ۱۲۴۳ کیلو وریجې، ۱۰۰ بابه خیمې او ۱۰۰۰ تختې کمپلې پکې شاملې دي.
نېټه:۱۹ /۱۰ /۱۴۴۶ هــ ق
له پېښو.سره د مبارزې آمادګۍ ملي اداره
