د کابل ولایت له پېښو سره د مبارزې آمادګۍ ریاست ۳۳۸ زیانمنو کورنیو ته نغدي مرستې ووېشلې
له پېښو سره د مبارزې آمادګۍ ملي ادارې او د IRC موسسې ترمنځ د هوکړه لیک له مخې د کابل ولایت له پېښو سره د مبارزې آمادګۍ ریاست د یادې موسسې په مالي ملاتړ، د کابل ښار اتمې او اوولسمې ناحیو اړوند ۳۳۸ زیانمنو کورنیو ته د ژمني توکو او جامو پېرلو لپاره نغدي مرستې ووېشلې.
په دې لړۍ کې د یاد ریاست رئیس محترم مولوي نجیب الله انوري او د موسسې استازي په شتون کې هرې کورنۍ ته ۲۷۰۰ افغانۍ ووېشل شوې.
د یادونې وړ ده چې په دې پروګرام کې په ټولیز ډول د هرې کورنۍ لپاره د ۳۲۰ ډالرو معادل افغانۍ په پام کې نیول شوي چې په اتو قسطونو کې به یاد شمېر کورنیو ته ووېشل شي.
ورته مهال د مرستو ترلاسه کوونکو له یاد ریاست او موسسې څخه د مرستو په پار مننه او خوښي څرګنده کړه او د مرستو د دوام غوښتنه او د اسلامي امارت د بقا لپاره یې دعا وکړه.
نېټه:۱۴۴۶/۶/۱۴
له پېښو سره د مبارزې آمادګۍ ملي اداره
