د پېښو پر وړاندې چمتووالي ملي ادارې سرپرست د بشري مرستو همغږي کونکې موسسې له رییس سره وکتل؛ په غور ولایت کې د وروستیو سېلاب ځپلو سره به ۳۵۰ زره ډالر نغدي مرستې ترسره شي
کابل- د چنګاښ ۲۰-۱۴۰۳
محترم الحاج ملا محمد نورالدین ترابي، د پېښو پر وړاندې چمتووالي ملي ادارې سرپرست، نن ماسپښین په خپل کاري دفتر کې د محترم الحاج ملا عبدالولي څارنوال په حضور سره له محترم تاج محمد بصیري، د بشري مرستو همغږي کونکې موسسې له اجرائیوي رییس سره وکتل او د هغه کاري راپور یې واوریده.
په دې کتنه کې د بشري مرستو همغږي کونکې موسسې اجرائیوي رییس (CHA) ووېل: چې دا موسسه یو داخلي سازمان دی او له ۳۷ څخه زیات کلونه کېږي، چې د کرنې، تعلیم و تربیه، ټولنیزې پراختیا، روغتیا او طبیعي پېښو په برخه کې د هیواد په ۲۲ ولایتونو کې فعالیت کوي. نوموړي زیاته کړه چې په سویلي، لویدیځ، شمالي او مرکزي ولایتونو کې یې د پېښو خطرونو د کمولو لپاره وقایوي پروژې پلي کړې دي، او اوس مهال په کندهار او هلمند ولایتونو کې هم مهمې پروژې د پلې کېدو په حال کې دي.
ښاغلي بصیري همدارنګه ژمنه وکړه چې په راتلونکو اوونیو کې به د غور ولایت سېلاب ځپلو ته ۳۵۰ زره ډالر ووېشل شي.
ورته مهال د پېښو پر وړاندې چمتووالي ملي ادارې سرپرست، نوموړي موسسه د پېښو له امله زیانمنو او د پېښو خطرونو کمولو په برخه کې د لازیاتو وقایوي پروژو د پلي کولو لپاره وهڅوله. او هغوۍ ته یې ډاډ ورکړ چې د پېښو پر وړاندې چمتووالي ملي اداره چمتو ده ترڅو د وقایوي پروژو د پلي کولو په برخه کې له دې موسسې سره همکاري وکړي. او په راتلونکې کې به د لا زیاتو همکاریو تړونونو لاسلیک کولو لپاره زمینه برابره کړي.
