په کابل ولایت کې د دوو فیرونو د توپ مرمۍ کشف او خنثی کړل شوې
د کابل ولایت له پېښو سره د مبارزې آمادګۍ ریاست د ډافادر مؤسسې د ماینپاکۍ ټیم په همکارۍ، د کابل ښار د شپږمې حوزې د پاکولو په عملیاتو کې د ۱۱۵ میلیمتري دوه د توپ مرمۍ وموندلې او په خوندي توګه یې له منځه یووړې، دا مرمۍ د ملي موزیم دننه موندل شوې وې.
دا عملیات د ښار د اوسېدونکو او عامه ځایونو د خوندیتوب په موخه ترسره شوي وو. د ماینپاکۍ تخنیکي ټیم د سیمې له کره ارزونې وروسته دواړه مرمۍ چې د موزیم دننه وې، وپېژندلې او په خوندي ډول یې له منځه یووړې.
د ماینپاکۍ د ټیم پر وخت ګام د ملي موزیم د کارکوونکو او لیدونکو لپاره د هر ډول احتمالي پېښې او ګواښ مخه ونیوله.
د کابل ولایت له پېښو سره د مبارزې آمادګۍ ریاست مسؤلینو د ډافادر مؤسسې له همکارۍ مننه وکړه او د تاریخي او حساسو سیمو د پاکولو پر اهمیت یې ټینګار وکړ. دغه راز یې د ښار له اوسېدونکو وغوښتل چې د شکمنو ځایونو په اړه اړوندو ادارو ته خبر ورکړي.
نېټه: ۱۴۴۷/۰۵/۰۶ هـ ق
له پېښو سره د مبارزې آمادګۍ ملي اداره
